Oor Cecilia

Cecilia Steyn is in Welkom in die Vrystaat gebore. Sy was vir vyftien jaar takadministreerder van ‘n gemeenskapsapteek in Klerksdorp. In 2017 verruil sy syfers vir woorde en begin sy voltyds skryf . Sy beskou Ma-wees van twee wonderlike seuns haar grootste sukses in die lewe. Sy woon tans op ‘n kusdorp in die Oos-Kaap saam met haar man. Die karakters in haar stories vul nou die leemte in haar leë nes. Sy is ook lief vir diere en die see. Cecilia is die suster van gewilde skrywer, Fanie Viljoen.

Volledige CV

Inligting vir jou skoolprojek:

Geboortedatum: 9 September 1974

Laerskool: Welkom Volkskool

Hoërskool: Goudveld Hoërskool

Matrikuleer: 1992

Getroud: Ja, met Johan Steyn

Kinders: 2 Seuns en 1 skoondogter, Marius, Surita en Francois

Troeteldiere: ‘n Wit Labrador, Oreo

As kind het Cecilia dit geniet om uitrustings te ontwerp. Sy was mal oor swem, netbal, akrobaat, musiek en kon ure saam met die buurt se kinders speel. Sy het al een maal per ongeluk haar hondjie, Ounooi met ‘n krieketkolf disnis geslaan toe sy die bal wou vang. Ounooi was darem oukei. Cecilia het toe al ‘n lewendige verbeelding gehad en wou graag ‘n Wimbledonkampioen, ‘n prinses, ‘n sangeres en ‘n fisioterapeut word.

Sy het een maal ook amper haar broer, skrywer Fanie Viljoen, se motor in die parkeerterrein van Welkom se biblioteek omgegooi toe hy haar leer bestuur het.

Cecilia het eers in haar dertigs lief geword vir lees al het sy in ‘n huis vol boeke grootgeword. As kind het sy haar net verlustig aan die mooi omslae en illustrasies van die boeke wat sy uitgeneem het.

Sy is baie trots daarop dat haar oudste seun sy vrou in ‘n boekwinkel ontmoet het!

Deesdae as sy nie lees nie, skryf sy. Sy skryf jeugverhale want dit is haar gunsteling genre om te lees.

Cecilia geniet dit ook om haar lyf binnehuisversierder te hou en om ou meubels nuwe lewe te gee. Sy is nog net so lief vir swem en swem veral in die Meerminpoel op die dorpie, Kayser’s Beach waar hulle ‘n vakansiehuis het.

Cecilia was al in Griekeland, Dubai en Turkye.

Sy is bang vir slange en spinnekoppe en is moontlik verslaaf aan sjokolade.